HDP Hakkari milletvekili Sait Dede'nin Kurban Bayramı vesilesi ile yayınladığı Kürtçe Mesaj'da şu ifadelere yer verildi:

"Di berdewamiya vê pêvajoya qirkirin û talanê de dîsa cejneke din a qurbanê ser gel de rû da. Bi destê kujer, xwînmij, desthilatdar, sermayedaran û alîgirên wan ve hêj girtin, înkar, qirêjî, tirs û xof bênavber li ser gelê mezlûm ê Kurdistan'ê û rojhilatanavîn de didome...

Oldarî, bawerî, qanûn-zagon, aborî, siyaset û her cure amûrên bi ked û xwiha eniya gel ve bidestxistî, mixabin ku desthilatdar jî bo berjewendiyên xwe û komên xwe bikartînin. Rewşa Kurdistanê, Sûriyê, Îranê, Iraqê, Tirkiyê û welatên din ên Rojhilatanavîn berçav e...

Bi taybet gelê Kurd û gelên bindest ên din bi her awayî lihemberî şereke qirêj ve rûbirû ne...
Miletê bindest; her cure îşkenceya girtin, kûştin, birçîhêlan, tirsa bêkarî, tehdît, îmha-înkar, tirsa jiyanê, talan û wêranî dîtiye û jiyan kiriye.

Metîngeran zulm û zordarî tucar neberdaye...

Li hemberî wê zulm û zordariyê jî gelê birûmet tucar serê xwe netewandiye û berxwedaneke mezin ve bûye bersiva neheqiyê...  jibo jiyanek birûmet jî hêj berxwe dide.

Di sedsala 21. 'de jî bi taybet tecawiz û kuştina jin û zarokan mixabin berdewam e û zêde dibe.
Bi hêviya ku êdî insan nebine qurban!

Şîn û tazî bibine coş û seyran!
Girtî û hewsî derkevine kolanan!
 Ji bo jiyanek azad û serfiraz! 
Ji bo dinyayek bê zulm û bê zordestî!
Ji bo xelasiya metîngeriyê!

Cejna Qurbanê bibe sedema azadî, aşitî, yekitî, biratî, bextewarî, aramî û serxwebûnê!
Hêviya me ev e ku Xudayê dilovan ji vê roja pîroz û mibarek fitne û fesadiyê, xwefiroşiyê, neheqiyê, zulmê, xirabkirinê bibirîne. Xudayê dilovan aramî, bextewarî, jiyanek birûmet û serfiraz bike nesîbê miletê me!

Bi taybet cejna gelê Çelê, Şemzînan, Colemêrg, Gever û ya hemû Kurdistani yan pîroz be!

Nîşe : Daxwaz û hêviya me ew e ku gelê me li hember nexweşiyan hişyar, baldar û seliqe be. Bila Cejneke bê acizî û bênexweşî derbas bibe."